कापूस पिकावरील गुलाबी बोंड अळीचे सामुहिकरित्या एकिकृत कीड व्यवस्थापन

अकोला,दि.29(जिमाका)-   मागील आठवड्यात तेल्हारा तालुक्यातील दानापूर व अकोला तालुक्यातील अन्वी येथे लवकर पेरणी केलेल्या काही शेतकऱ्यांच्या कापूस पिकावर पिक फुलोरा अवस्थेत असतांना गुलाबी बोंडअळीचा प्रादुर्भाव दिसून आला. त्या मुळे या किडीचा प्रादुर्भाव पुढील काही दिवसात इतरही भागामध्ये वाढण्याची शक्यता नाकारता येत नाही.

            हा प्रादुर्भाव आटोक्यात आणण्यासाठी शेतकऱ्यांनी कापूस पिक नियमित निरीक्षणात ठेऊन सामुहिकरित्या उपयोजना कराव्या.त्या याप्रमाणे-

१)     कापूस पिक नियमित निरीक्षणात ठेवावे.

२)     कापूस पिकामध्ये निरीक्षणासाठी एकरी दोन कामगंध सापळे व व्यवस्थापना साठी एकरी आठ कामगंध सापळे शेतामध्ये लावावे. कामगंध सापळ्या मध्ये अडकलेले नर पतंग वेळोवेळी काढून कीटकनाशकाच्या मिश्रित पाण्यात टाकून  नष्ट करावे.

३)     कापूस पिकात आढळलेल्या डोम कळ्या प्रादुर्भाव ग्रस्त पात्या, फुले व बोंडे हाताने तोडून त्यातील अळी सह कीटकनाशक मिश्रीत पाण्यात टाकून नष्ट करावे.

४)   कापूस पिकावर पाच टक्के निंबोळी अर्काची फवारणी तातडीने प्रतिबंधक उपाय योजना म्हणून करावी.

५)    बोंड अळीच्या व्यवस्थापनासाठी ट्रायकोग्रामा हेक्टरी एक ते दीड लाख अंडी शेतामध्ये लावावी.

६)     या किडीने आर्थिक नुकसान संकेत पातळी ओलाडल्यास म्हणजेच शेतात दहा टक्के कीड ग्रस्त पात्या, फुले व  बोंडे आढळल्यास किवा कामगंध सापळ्यात आठ ते दहा नर पतंग सतत तीन ते चार दिवस प्रती कामगंध सापळ्यात असे आढळून आल्यास याप्रमाणे कोणत्याही एका कीटक नाशकाची फवारणी करावी.

i) क्विनॉलफॉस २०% ए एफ २० मिली

ii) थायोडीकार्ब ७५% डब्लू पी २० ग्रँम प्रती १० लिटर पाण्यामध्ये मिसळून फवारणी करावी.

नोव्हेंबरच्या आधी गुलाबी बोंड अळीच्या व्यवस्थापनाकरिता सिंथेटीक पायरेथ्रोइडचा, सायपरमेथ्रीन, डेल्टामेथ्रीन,इत्यादी कीटक नाशकांचा वापर कटाक्षाने टाळावा जेणे करून पांढरी माशीचा उद्रेक होणार नाही.

अशा प्रकारच्या उपाययोजना करून शेतकऱ्यांनी गुलाबी बोंड अळीचे व्यवस्थापन करावे, असे आवाहन  जिल्हा अधिक्षक कृषि अधिकारी, अकोला यांनी केले आहे.