गुणवंत मागासवर्गीय मुलांचे शासकीय वसतीगृह येथे प्रवेश अर्ज वाटप सुरू

 अकोला,दि.7 (जिमाका)- सामाजिक न्याय व विशेष सहाय्य विभागामार्फत मागासवर्गीय मुलामुलींसाठी गुणवंत मागासवर्गीय मुलांचे शासकीय वसतीगृह,  हनुमान बस्ती, अकोला येथे शासकीय वसतीगृह चालविली जातात. या वसतीगृहात इयत्ता 11 वी प्रवेशासाठी प्रवेश अर्ज वाटप करणे सुरु असून लाभार्थ्यांनी अर्ज सादर करावा, असे आवाहन गुणवंत मागासवर्गीय मुलांचे शासकीय वसतीगृहाचे गृहपाल एस. एस. लव्हाळे यांनी केले आहे.

मागासवर्गीयांची शैक्षणिक, सामाजिक आर्थिक उन्नती, तसेच त्यांचे राहणीमान, समाजातील इतर घटकांप्रमाणे त्यांना जीवन जगता यावे, तसेच त्यांना सर्व प्रकारचे शिक्षण व उच्च शिक्षणाच्या संधी उपलब्ध व्हाव्यात या उद्देशाने शासकीय वसतीगृह योजना सुरू करण्यात आली आहे. त्या अनुषंगाने, गुणवंत मागासवर्गीय मुलांचे शासकीय वसतीगृहात इयत्ता 11 वी साठी मागासवर्गीय विद्यार्थ्यांच्या जागा उपलब्ध असून प्रवेश अर्ज वाटप करण्याची प्रक्रिया सुरु झाली आहे असून गुणवत्ता व आरक्षण निहाय मागासवर्गीय विद्यार्थ्यांची निवड करण्यात येणार आहे. अकोल्याचा रहिवासी नसलेल्या परंतु अकोला म. न. पा. हद्दीतील महाविद्यालयात प्रवेश घेतलेल्या किंवा घेवू इच्छिणाऱ्या जास्तीत जास्त होतकरू मागासवर्गीय विद्यार्थ्यांनी अर्ज करावे, असे आवाहन गुणवंत मागासवर्गीय मुलांचे शासकीय वसतीगृहाचे गृहपाल यांनी केले आहे.

0000