पंडीत दीनदयाल उपाध्याय रोजगार मेळावा; 113 उमेदवारांची प्राथमिक निवड

अकोला, दि.8(जिमाका)-  पंडीत दीनदयाल उपाध्याय रोजगार मेळाव्याचे आज जिल्हाधिकारी कार्यालयात आयोजन करण्यात आले. या मेळाव्यास 228 उमेदवारांनी हजेरी लावली व मुलाखत दिली. त्यातील 113 उमेदवारांची प्राथमिक निवड करण्यात आली असल्याची माहिती जिल्हा कौशल्य विकास, रोजगार उद्योजकता मार्गदर्शन केंद्राचे सहायक आयुक्त द.ल. ठाकरे यांनी  दिली आहे.

  जिल्हा कौशल्य विकास,रोजगार व उद्योजकता मार्गदर्शन केंद्र आणि  अकोला शासकीय औद्योगिक प्रशिक्षण संस्था यांच्यावतीने रोजगार मेळाव्याचे आयोजन करण्यात आले. या मेळाव्यात 1.जसनागरा पब्लीक स्कुल, रिधोरा ता.जि.अकोला, 2. अक्षत इंटरप्रायजेस, गोकुल कॉलनी, अकोला, 3. इनोट्रो मल्टीसर्व्हीसेस,अकोला, 4. ॲबेल इलेक्टो सॉप्ट टेक्नोलॉजीस प्रा.लि.अकोला, 5. पिपल ट्री ऑनलाईन पुणे, 6. महिंद्रा ॲण्ड महिंद्रा लि.पुणे, 7. टॅलेनसेतू सर्व्हीसेस प्रा.लि.पुणे  या सात कंपन्यांनी सहभाग नोंदविला. 211 पदांसाठी ही भरती  प्रक्रिया राबविण्यात आली.  भरती प्रक्रियेसाठी 228 उमेदवारांनी हजेरी लावली. त्यातील 113 उमेदवारांनी प्राथमिक निवड करण्यात आली. यावेळी जिल्हाधिकारी निमा अरोरा, जिल्हा रोजगार स्वयंरोजगार व कौशल्य विकास विभागाचे सहायक आयुक्त द.ल. ठाकरे यांचे मार्गदर्शन व सहकार्य लाभले.

जिल्हा कौशल्य विकास, रोजगार व उद्योजकता मार्गदर्शन केंद्र, शासकीय औद्योगिक प्रशिक्षण संस्था यांच्या संयुक्त विद्यमाने या मेळाव्याचे आयोजन करण्यात येते. रोजगार मेळावा दर महिन्याला जिल्हाधिकारी कार्यालय परिसरात आयोजित केला जातो. पात्र व  इच्छुक उमेदवारांनी आपला बायोडाटा, शैक्षणिक कागदपत्रे, आधारकार्ड, पासपोर्ट फोटो सह स्वखर्चाने उपस्थित रहावे लागते. दरमहा होणाऱ्या रोजगार मेळाव्यासंदर्भात अधिक माहितीसाठी जिल्हा कौशल्य विकास, रोजगार उद्योजकता मार्गदर्शन केंद्र अकोला या कार्यालयाच्या दूरध्वनी क्रमांक 0724-2433849 अथवा भ्रमणध्वनी क्रमांक 9665775778 क्रमांकावर संपर्क साधावा, असे आवाहन करण्यात आले आहे.

०००००