धर्मदाय रक्तपेढ्यांमधुन पिवळी शिधापत्रिकाधारक रुग्णांना मोफत रक्त द्यावे-जिल्हाधिकारी पापळकर यांचे निर्देश

 

अकोला,दि.२४(जिमाका)- शासनाने  सार्वजनिक आरोग्य विभाग व वैद्यकीय शिक्षण विभागाअंतर्गत  वैद्यकीय महाविद्यालये व संलग्न शासकीय रुग्णालयात भरती असलेल्या रुग्णांना रक्त व रक्त घटक मोफत उपलब्ध करुन देण्याचा निर्णय घेतला आहे. त्याचप्रमाणे धर्मदाय नोंदणीकृत संस्थांकडून चालविल्या जाणाऱ्या रक्तपेढ्यांमधुनही  १० टक्के रक्तपुरवठा  पिवळी शिधापत्रिकाधारक रुग्णांना उपलब्धतेप्रमाणे मोफत द्यावा , असे निर्देश जिल्हाधिकारी जितेंद्र पापळकर यांनी आज येथे दिले.

शासनाच्या धोरणानुसार, धर्मदाय रुग्णालयांमध्ये गरीब  व निर्धन रुग्णांसाठी मोफत व सवलतीच्या दरात खाटा राखुन ठेवण्याच्या योजनेच्या अंमलबजावणीबाबत बैठक घेण्यात आली. या बैठकीस जिल्हाधिकारी जितेंद्र पापळकर तसेच जिल्हा शल्य चिकित्सक डॉ. राजकुमार चव्हाण, निवासी उपजिल्हाधिकारी संजय खडसे, तसेच  धर्मदाय रुग्णालयांचे प्रतिनिधी व रक्तपेढ्यांचे प्रतिनिधी उपस्थित होते.

यावेळी माहिती देण्यात आली की,  होमिओपॅथिक  वैद्यकीय रुग्णालय, अकोट रोड अकोला येथे  एकुण वीस खाटांपैकी दोन (निर्धन रुग्णांसाठी ) दोन (दुर्बल घटकांसाठी), राधाकिसन तोष्णिवाल आयुर्वेद महाविद्यालय केडिया प्लॉट व आयुर्वेदीक रुग्णालय, स्टेशन रोड अकोला यांच्या १०० खाटांपैकी  दहा, दहा, संत तुकाराम हॉस्पिटल ॲण्ड रिसर्च सेंटर तुकाराम चौक यांच्या ५० खाटांपैकी पाच- पाच,  नलिनीताई राऊत आयुर्वेदिक रुग्णालय व डॉ. वंदनाताई  ढोणे आयुर्वेदिक महाविद्यालय, पातुर यांच्या १४८ खाटांपैकी १५-१५,  अकोला नेत्ररुग्णालय व अकोला डायलिसीस सेंटर रामदास पेठ अकोला यांच्या ३० खाटांपैकी तीन- तीन,  दम्माणी नेत्ररुग्णालय, आपातापा रोड अकोला यांच्या २० खाटांपैकी दोन-दोन,  जनता होमिओपॅथिक  मेडिकल कॉलेज व रुग्णालय केडिया प्लॉट यांच्या २० खाटांपैकी दोन- दोन,  डॉ. राजेश आर कांबे डेन्टल  कॉलेज ॲण्ड हॉस्पिटल कान्हेरी सरप यांच्या १०० खाटांपैकी दहा-दहा खाटा राखीव ठेवण्यात आल्या आहेत.

या प्रमाणेच जिल्ह्यातील धर्मदाय रक्तपेढ्यांनीही  निर्धन व गरीब रुग्णांना मोफत व सवलतीच्या दरात रक्तसाठा आवश्यकतेनुसार उपलब्ध करुन द्यावा, अशी सुचना जिल्हाधिकारी पापळकर यांनी केली. त्यानुसार पिवळी शिधापत्रिकाधारक रुग्णांना मोफत  उपलब्ध करुन द्यावा,असे निर्देश जिल्हाधिकारी जितेंद्र पापळकर यांनी दिले.