सामाजिक न्याय विभागाच्यावतीने अकोला जिल्ह्यात 'सामाजिक न्याय पर्व' आयोजन

अकोला,दि. 25(जिमाका) -   26 नोव्हेंबर या संविधानदिनापासून ते 6 डिसेंबर या भारतरत्न डॉ. बाबासाहेब आंबेडकरांच्या महापरिनिर्वाणदिना दरम्यान अकोला जिल्ह्यात‘सामाजिक न्याय पर्व’ साजरे करण्यात येणार  आहे. या पर्वा अंतर्गत भारतीय संविधानाबाबत जागृती करण्यासाठी शासकीय शाळा, महाविद्यालयांमध्ये विविध स्पर्धा व उपक्रमांचे आयोजन करण्यात येणार असल्याचे जिल्हा समाजकल्याण विभागाच्या सहाय्यक आयुक्त डॉ.अनिता राठोड यांनी दिली आहे.    

    जिल्ह्यात ‘सामाजिक न्याय पर्वा निमित्ताने सामाजिक न्याय विभागाच्या अधिनस्त असलेल्या  जिल्ह्यातील सर्व शासकीय निवासी शाळा,सर्व शासकीय वसतीगृह,समाजकार्य महाविद्यालय,विजाभज आश्रम शाळा तसेच समान संधी केंद्र स्थापन केलेल्या सर्व महाविद्यालयात “भारताचे संविधान” या विषयावर प्रश्नमंजुषा, बहुपर्यायी प्रश्न परीक्षा, वक्तृत्व स्पर्धा अशा विविध स्पर्धांचे आयोजन करण्यात येणार आहे.  

       या पर्वांतर्गत संविधानाच्या उद्देशिकेचे वाचन करण्यात येणार आहे. नागरिकांचे हक्क व कर्तव्ये आदी विषयांवर व्याख्यानांचे आयोजन, विद्यार्थ्यांकडून भारतीय संविधानाच्या उद्देशिकेचे लेखन करून घेण्यात येणार असल्याचे  डॉ. राठोड यांनी सांगितले आहे.

                                                               ०००००