पदवीधर मतदार नोंदणी कार्यक्रम घोषीत; 1 ऑक्टोबरपासून नोंदणी सुरु

अकोला,दि.29(जिमाका)- निवडणूक आयोगाच्या निर्देशानुसार अमरावती पदवीधर मतदार संघाच्या मतदार याद्या तयार करण्याचा कार्यक्रम 1 ऑक्टोबरपासून सुरु होत आहे. त्यानअुषंगाने जिल्ह्यातील सर्व पात्र पदवीधर मतदारांनी संबधित तहसिल कार्यालय व पदनिर्देशीत ठिकाणी नोंदणीसाठी अर्ज करावे, असे आवाहन जिल्हाधिकारी तथा जिल्हा निवडणूक अधिकारी निमा अरोरा यांनी केले.

पुनरिक्षण कार्यक्रम याप्रमाणे:  मतदार नोंदणी अधिनियम 1960 चे कलम 31 (3) अन्वये जाहीर सूचना प्रसिध्दी शनिवार   दि. 1 ऑक्टोबरला होईल. मतदार नोंदणी अधिनियम 1960 चे कलम 31 (4) अन्वये वर्तमानपत्रातील नोटीसची प्रथम पुन:प्रसिध्दी शनिवार, दि. 15 ऑक्टोबर रोजी, तर वर्तमानपत्रातील नोटीसची व्दितीय पुन:प्रसिध्दी मंगळवार, दि. 25 ऑक्टोबरला करण्यात येईल. नमुना 18 किंवा 19 व्दारे दावे व हरकती स्विकारण्याचा अंतिम सोमवार दि. 7 नोव्हेंबर राहील. जुना नमुना स्वीकारला जाणार नाही.  हस्तलिखिते तयार करणे व प्रारुप मतदार याद्यांची छपाई शनिवार, दि. 19 नोव्हेंबर तर प्रारुप मतदार याद्यांची प्रसिध्दी बुधवार, दि. 23 नोव्हेंबर रोजी करण्यात येईल. दावे व हरकती स्वीकारण्याचा कालावधी हा बुधवार, दि. 23 नोव्हेंबर  ते शुक्रवार दि. 9 डिसेंबर पर्यंत राहील. दावे व हरकती निकाली काढणे, पुरवणी यादी तयार करणे व छपाई करणे याची अंतिम मुदत रविवार, दि. 25 डिसेंबर आहे. तर मतदार यादीची अंतिम प्रसिध्द शुक्रवार, दि. 30 डिसेंबर रोजी जाहीर करण्यात येईल.

000000