उत्कृष्ट ग्रंथालय आणि ग्रंथालय कार्यकर्ता पुरस्कारासाठी अर्ज करण्याचे आवाहन

 

उत्कृष्ट ग्रंथालय आणि ग्रंथालय कार्यकर्ता

पुरस्कारासाठी अर्ज करण्याचे आवाहन

अकोला, दि. २८ :  उच्च व तंत्र शिक्षण विभागांतर्गत ग्रंथालय संचालनालयाकडून ग्रंथालयांचा गुणात्मक विकास व वाचन संस्कृती वृध्दिंगत करण्यासाठी "डॉ. बाबासाहेब आंबेडकर उत्कृष्ट ग्रंथालय पुरस्कार" तसेच ग्रंथालय चळवळीतील कार्यकर्ते व सेवक यांना ग्रंथमित्र पुरस्कार दिला जातो. त्यासाठी दि. ३० सप्टेंबरपूर्वी जिल्हा ग्रंथालयाकडे अर्ज करण्याचे आवाहन करण्यात आले आहे.

 

ग्रंथमित्र पुरस्कार भारतीय ग्रंथालय शास्त्राचे जनक डॉ. एस. आर. रंगनाथन यांच्या नावे उत्कृष्ट ग्रंथालय कार्यकर्ता व सेवक यांना दिला जातो. राज्यातील शहरी व ग्रामीण विभागातील "अ", "ब", "क","ड" वर्गातील उत्कृष्ट शासनमान्य सार्वजनिक ग्रंथालयांना अनुक्रमे १ लक्ष रू., ७५ हजार रु., ५० हजार रू. व २५ हजार रू. अशी रोख रक्कम, सन्मानचिन्ह, प्रमाणपत्र आणि ग्रंथभेट देऊन गौरविण्यात येते.

राज्यातील एक राज्यस्तरीय उत्कृष्ट ग्रंथालय कार्यकर्ता व एक राज्यस्तरीय उत्कृष्ट ग्रंथालय सेवक यांना प्रत्येकी ५० हजार रू. तसेच राज्यातील प्रत्येक महसुली विभागातील प्रत्येकी एक उत्कृष्ट ग्रंथालय कार्यकर्ता व उत्कृष्ट ग्रंथालय सेवक यांना प्रत्येकी २५ हजार रू. रोख रक्कम. सन्मानचिन्ह, प्रमाणपत्र आणि ग्रंथभेट देऊन गौरविण्यात येते.

सन २०२४-२५ या वर्षाच्या पुरस्कारासाठी इच्छुक असणारी ग्रंथालये, कार्यकर्ते व सेवक (ग्रंथमित्र) यांनी आपले विहित नमुन्यातील अर्ज आवश्यक त्या कागदपत्रांसह दिनांक ३० सप्टेंबरपूर्वी तीन प्रतीत जिल्हा ग्रंथालय अधिकारी कार्यालयाकडे पाठवावेत, असे आवाहन प्र. ग्रंथालय संचालक अशोक मा. गाडेकर यांनी केले आहे.

०००