सावकाराकडे गहाण मिळकतीबाबत दावे दाखल करण्याचे आवाहन

 

 

सावकाराकडे गहाण मिळकतीबाबत

दावे दाखल करण्याचे आवाहन

अकोला, दि. २८ : जुन्या शहरातील एका अवैध सावकाराकडे गहाण असलेल्या मिळकतीबाबत दावे दाखल करण्याचे आवाहन जिल्हा उपनिबंधक डॉ. प्रवीण लोखंडे यांनी केले आहे.

जिल्हा उपनिबंधक कार्यालयातर्फे दि. ७ फेब्रुवारी २०२४ रोजी राबविलेल्या धाडसत्रात पप्पू उर्फ मनोज वानखडे (जयहिंद चौक, जुने शहर) विनापरवाना सावकारी करताना आढळल्याने कारवाई करण्यात आली. त्यांच्याकडे ज्या व्यक्तींनी कर्जाचे तारण म्हणून मालमत्ता गहाण ठेवली होती, त्यांनी लेखी दावा आवश्यक पुराव्यासह करावा. कर्जदाराचे निधन झाले असल्यास वारसांनी दावा करावा.

अशा संबंधित व्यक्तींनी जिल्हा उपनिबंधक, सहकारी संस्था, सहकार संकुल, आदर्श कॉलनी, अकोला येथे दि. ९ सप्टेंबर रोजी सकाळी १०.३० वा. ते सायंकाळी ५.३० वा. या वेळेत मालमत्तेच्या कागदपत्रांची पाहणी करावी आणि दि. १० सप्टेंबर ते १९ सप्टेंबर दरम्यान मालमत्तेबाबत दावे सादर करावेत. त्यानंतर आलेल्या दाव्यांचा विचार होमार नाही व मालमत्ता शासनाकडे जमा होईल, असे जिल्हा उपनिबंधकांनी कळवले आहे.

०००