अर्थ व सांख्यिकी संचालनालयाचा उपक्रम कुटुंबाच्या एका वर्षात आरोग्यावर खर्चाची पाहणी करणार

 

अर्थ व सांख्यिकी संचालनालयाचा उपक्रम

कुटुंबाच्या एका वर्षात आरोग्यावर खर्चाची पाहणी करणार

अकोला, दि. 12 : राष्ट्रीय नमुना पाहणीच्या अनुषंगाने अर्थ व सांख्यिकी संचालनालयाच्या वतीने ३६५ दिवसांत एका कुटुंबाचा आरोग्यावर किती खर्च होतो, याबाबत सर्वेक्षण करण्यात येणार आहे. पाहणीत डिसेंबर २०२५ पर्यंत माहिती गोळा करण्यात येणार असून, सर्वेक्षणासाठी घरी येणा-या अधिकारी व कर्मचा-यांना संबंधित कुटुंबियांनी परिपूर्ण माहिती देण्याचे आवाहन जिल्हाधिकारी अजित कुंभार यांनी केले आहे.

ही माहिती केंद्र व राज्य शासनाला नियोजनासाठी, धोरणे राबविण्यासाठी उपयुक्त ठरणार आहे. शासकीय व खासगी दवाखान्यातून मिळणाऱ्या उपचारांवर होणारा खर्च, कुटुंबांचा आरोग्यविषयक होणारा खर्च, सर्व वयोगटातील लसीकरण, गर्भवती महिलांना मिळणाऱ्या सुविधांचा तपशील आदी माहिती गोळा करण्यात येईल.

सर्वेक्षणात कुटुंबांची निवड 'एक वर्ष किंवा एक वर्षापेक्षा कमी वयाचे मुल असणारे कुटुंब' आणि 'मागील ३६५ दिवसांमध्ये रुग्णालयामध्ये दाखल असणारी कुटुंबातील व्यक्ती' यामधून करण्यात येणार आहे. सदर सर्वेक्षणाचा उपयोग आरोग्य सेवा क्षेत्रात सुधारणा आणि सरकारच्या धोरणात्मक निर्णयाची अंमलबजावणी करण्यासाठी होतो. राष्ट्रीय तसेच राज्य पातळीवर प्रभावी निर्णय घेणे शक्य व्हावे यासाठी सर्वेक्षणाच्या माहितीची सत्यता व गुणवत्ता अत्यंत महत्वाची आहे. त्यानुसार कुटुंबांकडून माहिती घेणाऱ्या अधिकारी व कर्मचारी यांना सखोल प्रशिक्षण देवुन प्रशिक्षीत करण्यात आले आहे. ग्रामीण भागातील निवडक गावे व शहरी भागातील निवडक भागातील रॅन्डम पध्दतीने निवडक कुटुंबांना प्रत्यक्ष भेटी देऊन आरोग्यविषयक माहीती गोळा करतील. संबंधित कुटुंबियांनी कर्मचा-यांना पूर्ण सहकार्य करण्याचे आवाहन करण्यात आले आहे.

०००