'अमृत दुर्गोत्सव'ची विश्वविक्रमाला गवसणी

 

'अमृत दुर्गोत्सव'ची विश्वविक्रमाला गवसणी

अकोला, दि. 12 :  महाराष्ट्र संशोधन, उन्नती व प्रशिक्षण प्रबोधिनीतर्फे (अमृत) दिवाळीत ''अमृत दुर्गोत्सव 2025' हा एक आगळावेगळा उपक्रम राबविण्यात आला. प्रचंड प्रतिसाद मिळाल्याने या उपक्रमाची गिनीज बुक ऑफ वर्ल्ड रेकॉर्डमध्ये नोंद झाली आहे.

महाराष्ट्राचे आराध्य दैवत छत्रपती शिवाजी महाराजांचे शौर्य, पराक्रम, संस्कृती रक्षण, स्वभाषा, स्वधर्म यासारख्या अनेक गुणांना उजाळा देऊन अनेकांच्या मनावर सुसंस्कार करणे, या दृष्टीने समाजमन घडविणे आणि शिवाजी महाराजांना विश्वविक्रमी मानवंदना देणे हे उद्दिष्ट होते.  महाराजांच्या पराक्रमाची साक्ष असलेले आणि युनेस्कोने जागतिक वारसा स्थळ म्हणून घोषित केलेल्या बारा गडांपैकी कोणत्याही एकाची प्रतिकृती अंगणात, सोसायटी, शाळेत, मैदानात तयार करून त्यासोबत फोटो घेऊन तो संकेतस्थळावर करणे असे स्वरूप होते. सहभागींना मुख्यमंत्री यांच्या स्वाक्षरीचे अभिनंदन पत्र मिळणार होते.

       अमृतचे व्यवस्थापकीय संचालक विजय जोशी यांच्या मार्गदर्शनात हा उपक्रम व्यापक झाला. महाराष्ट्रभूमीबरोबरच अमेरिका, इंग्लंड, आखाती देशातून प्रतिसाद मिळाला. या प्रचंड प्रतिसादाची नोंद 'गिनीज वर्ल्ड रेकॉर्ड' या विश्वविक्रमांची नोंदणी करणाऱ्या संस्थेने घेतली.

       'मानवी हातांनी तयार केलेल्या प्रतिकृतींचा सर्वात मोठा डिजिटल फोटो अल्बम' या श्रेणीमध्ये 'अमृत दुर्गोत्सवात' विश्वविक्रम झाल्याचे प्रमाणपत्र गिनीज वर्ल्ड रेकॉर्ड' चे प्रतिनिधी प्रवीण पटेल यांच्या हस्ते अमृतचे व्यवस्थापकीय संचालक विजय जोशी यांना सुपूर्द केले. सुयोग्य चित्रे निवडणे, अस्पष्ट व दुबार चित्रांना बाद करणे आदी अनेक दिवस चाललेल्या अतिशय क्लिष्ट प्रक्रियेतून जाऊन विश्वविक्रम प्रस्थापित होऊ शकला याबद्दल त्यांनी समाधान व्यक्त केले.  

०००