वाहतुकीत शिस्त आणा; अंडरपास लवकर नागरिकांसाठी खुला करा जिल्हाधिका-यांचे निर्देश

 

अकोला, दि. २६ : शहरातील बसस्थानक परिसरातील अंडरपासबाबत असलेली समस्या त्वरित निकाली काढून अंडरपास नागरिकांसाठी लवकर खुला करावा. शहरातील वाहतुकीत शिस्त निर्माण करावी, असे निर्देश जिल्हाधिकारी वर्षा मीना यांनी आज येथे दिले.
त्या रस्ते सुरक्षा समितीच्या बैठकीत बोलत होत्या.अपर पोलीस अधिक्षक बी. सी. के रेड्डी, प्रादेशिक परिवहन अधिकारी रवींद्र भुयार,सार्वजनिक बांधकाम विभागाचे अधिक्षक अभियंता अविनाश धोंडगे, कार्यकारी अभियंता प्रसाद पाटील, शहर वाहतूक शाखा पोलीस निरीक्षक मनोज बहुरे, मनपा शहर अभियंता नीला वंजारी, राष्ट्रीय महामार्ग प्राधिकरण,जिल्हा परिषद प्रतिनिधी उपस्थित होते.
शिवणी विमानतळासमोरील रस्त्याचे काम त्वरित पूर्ण करावे. चुकीच्या दिशेने उड्डाण पुलावरून प्रवास करणाऱ्या व्यक्तींवर कठोर कारवाई होणे आवश्यक आहे. वारंवार अपघात होणाऱ्या रस्त्यावर सुरक्षिततेच्या दृष्टीने अपघातप्रवण स्थळ असा फलक, रिफ्लेक्टर्स पुरेशी प्रकाशव्यवस्था आदी उपाययोजना करावी. सार्वजनिक रस्त्यांवर बेकायदेशीरपणे पार्किंग करणाऱ्या वाहनांवर कारवाई करण्याचे निर्देश जिल्हाधिकारी श्रीमती मीना यांनी दिले.

ऑक्टोबर ते नोव्हेंबर २०२५ दरम्यान अकोला शहरातील मुख्य रस्त्यावर विनापरवानगी लावण्यात आलेले १४७ होर्डिंग्ज निष्कासित करण्यात आले असून ४८ हजार रुपये दंड मनपाच्या वतीने वसूल करण्यात आला. प्रादेशिक परिवहन विभागाच्या वतीने एप्रिल ते ऑक्टोबर दरम्यान नियमांचा भंग करणाऱ्या १४६ ऑटो रिक्षा,१५० खाजगी प्रवासी बसेस यांच्यावर कारवाई केली तर हेल्मेट न वापरणाऱ्या ५६९ वाहन धारकावर कारवाई केल्याची माहिती परिवहन विभागाने दिली.
०००