‘स्वाधार’साठी अर्जासोबत बँकेचा तपशील आवश्यक

 ‘स्वाधार’साठी अर्जासोबत बँकेचा तपशील आवश्यक

अकोला, दि. १२ : भारतरत्न डॉ. बाबासाहेब आंबेडकर स्वाधार योजनेसाठी पात्र विद्यार्थ्यांना १५ मार्चपर्यंत ऑनलाईन अर्ज करता येणार असून, रक्कम खात्यात मिळण्यासाठी अर्जासोबत बँकेचा तपशील जोडणे आवश्यक आहे. त्याची पूर्तता करण्याचे आवाहन सहायक आयुक्त डॉ. अनिता राठोड यांनी केले आहे.

अनुसूचित जाती व नवबौद्ध घटकातील शासकीय वसतिगृहात प्रवेश न मिळालेल्या विद्यार्थ्यांना शिक्षण घेता यावे म्हणून भोजन, निवास, इतर शैक्षणिक सुविधा या विद्यार्थ्यांना स्वत: उपलब्ध करून घेण्यासाठी आवश्यक रक्कम संबंधित विद्यार्थ्यांच्या आधार संलग्न बँक खात्यात थेट वितरित करण्यात येतात. त्यामुळे विद्यार्थ्यांनी बँक खात्याची माहिती ऑनलाईन भरणे आवश्यक आहे.

विद्यार्थ्यांनी पोर्टलवर लवकरात लवकर अर्ज व आवश्यक कागदपत्रे, तसेच आधार लिंक व केवायसी पूर्ण करण्यात आलेल्या अद्ययावत खाते, पासबुकच्या पहिल्या पानाची प्रत आदी पूर्ण माहिती ऑनलाईन भरून त्याची प्रिंट कॉपी समाजकल्याण कार्यालयात सादर करावी. भारत सरकार शिष्यवृत्ती, विद्यावेतन मिळण्यासाठी अर्ज केलेल्या विद्यार्थ्यांनीही हार्ड कॉपी देणे आवश्यक आहे. पोर्टलचा पत्ता ‘एचएमएएस.एमएएचएआयटी.ओआरजी’ असा असून, समाजकल्याण कार्यालय दक्षतानगरात निमवाडी परिसरातील डॉ. बाबासाहेब आंबेडकर सामाजिक न्यायभवन येथे आहे.

०००