महसूल सप्ताह नियोजनपूर्वक व समन्वयाने सर्वदूर यशस्वी करा - जिल्हाधिकारी अजित कुंभार
महसूल सप्ताह नियोजनपूर्वक
व समन्वयाने सर्वदूर यशस्वी करा
-
जिल्हाधिकारी अजित
कुंभार
अकोला, दि. 31 : महसूल
विभागामार्फत उद्यापासून (दि. 1 ऑगस्ट) 7 ऑगस्टपर्यंत ‘महसूल सप्ताह’ साजरा
करण्यात येणार आहे. या कालावधीत प्रलंबित प्रकरणांचा निपटारा करण्याबरोबरच विविध प्रमाणपत्रांचे वाटप करण्यासाठी शिबिरे
घेण्यात येतील. सर्व तालुक्यांत महसूल सप्ताहाचे नियोजनपूर्वक व समन्वयाने यशस्वी
आयोजन करावे, असे निर्देश जिल्हाधिकारी अजित कुंभार यांनी आज येथे दिले.
सप्ताहाच्या
पूर्वतयारीचा आढावा घेताना ते बोलत होते. महसूल उपजिल्हाधिकारी अनिता भालेराव व
विविध अधिकारी उपस्थित होते.
सप्ताहाचा शुभारंभ मंगळवारी (दि. 1 ऑगस्ट) सकाळी 7 वाजता श्रमदानाने होणार आहे.
जिल्हाधिकारी कार्यालयातील अधिकारी व कर्मचारी श्रमदानात सहभागी होतील. दि. 2 ऑगस्ट
रोजी ‘युवा संवाद’, दि. 3 ऑगस्ट रोजी ‘एक हात मदतीचा’, दि. 4 ऑगस्ट रोजी ‘जनसंवाद’
कार्यक्रमात कार्यक्रम होईल. दि. 5 ऑगस्ट रोजी ‘सैनिक हो तुमच्यासाठी’, दि. 6 ऑगस्ट, रोजी ‘महसूल सेवानिवृत्त अधिकारी, कर्मचारी संवाद’ होईल. दि. 7 ऑगस्ट, रोजी सप्ताहातील कार्यक्रमांची फलनिष्पत्ती व विशेष उल्लेखनीय
कामकाजाची दखल घेऊन सांगता होईल.
ई- हक्क पोर्टलबाबतची कार्यवाही,
महसूल नोंदी दुरुस्ती, गाव तिथे स्मशानभूमी सुविधा निर्माण करण्यासाठी मोहिम, दहावी-बारावी
उत्तीर्ण विद्यार्थ्यांना प्रमाणपत्र वाटप, सैनिकांना प्रमाणपत्र वाटप आदी कार्यक्रम
राबविण्यात येतील. सलोखा योजनेत गावागावांतील व शेतातील
रस्त्यांबाबत तलाठी, मंडळ अधिकारी स्तरावर प्रलंबित असलेले अर्ज निकाली काढण्यासाठी
तलाठी कार्यालयांमार्फत शिबीरांचे आयोजन करण्यात येईल.
विविध मान्यवर व अधिकाधिक
नागरिकांचा सहभाग मिळवून महसूल सप्ताह यशस्वीपणे साजरा करण्याचे आवाहन जिल्हाधिका-यांनी
केले.
०००
टिप्पण्या
टिप्पणी पोस्ट करा