स्वाधार योजनेसाठी अर्ज करण्याचे आवाहन

 

अकोला, दि. 30 : सामाजिक न्याय व विशेष सहाय्य विभागातील शासकीय वसतीगृहात प्रवेशासाठी पात्र असलेल्या परंतु वसतीगृहातील विद्यार्थी क्षमतेअभावी शासकीय वसतीगृहात प्रवेश न मिळालेल्या अनु.जाती व नवबौध्द प्रवर्गातील इयत्ता ११ वी व १२ वी  नंतरच्या व्यावसायिक तसेच बिगर व्यावसायिक अभ्यासक्रमामध्ये प्रवेशीत विद्यार्थ्यांना पुढील शिक्षण घेता यावे म्हणून भोजन, निवास व इतर शैक्षणिक सुविधा विद्यार्थ्यांना स्वतः उपलब्ध करून घेण्यासाठी आवश्यक रक्कम विद्यार्थ्यांचे आधार संलग्नी बँक खात्यामध्ये थेट जमा करण्याकरिता शासन निर्णय दि. ६ जाने २०१७ अन्वये भारतरत्न डॉ. बाबासाहेब आंबेडकर योजना सुरू केलेली आहे.
त्यामुळे विद्यार्थ्यांनी  सन २०२५-२६ या शैक्षणिक वर्षांकरिता होस्टल मॅनेजमेंट सिस्टीम या साईडवर https://hmasscrutinyworkflow.mahait.org/ ऑनलाईन अर्ज करावयाचे आहे. या योजनेच्या लाभाकरीता सदर अर्ज सादर करताना अभ्यासक्रमाचे प्रथम वर्षाकरिता विद्यार्थ्यांनी सामाजिक न्याय व विशेष सहाय्य विभागाचे शासकीय वसतीगृहासाठी प्रथम वर्षाचा अर्ज ऑनलाईन भरणे आवश्यक आहे. सदर अर्ज पात्र असल्यास व शासकीय वसतीगृह प्रवेश प्रक्रीयेनंतर वसतीगृह प्रवेश क्षमतेअभावी वसतीगृहात प्रवेश न मिळालेले विद्यार्थी या योजनेकरिता पात्र असतील. त्यामुळे स्वाधार योजनेकरीता अर्ज भरणाऱ्या सर्व विद्यार्थ्यांनी अभ्यासक्रमाच्या प्रथम वर्षाकरिता स्वाधार योजनेचा अर्ज करताना ही महत्वाची बाब लक्षात घेऊन ऑनलाईन अर्ज सादर करावेत.
सर्व विद्यार्थ्यांना आवाहन करण्यात येते की, तालुका स्तरावर सुद्धा स्वाधार योजना लागू करण्यात आलेली आहे. त्यामुळे मुख्यत्वे तालुक्याचे ठिकाणी महाविद्यालय असलेल्या व तेथे प्रवेशित तालुक्यातील विद्यार्थी सुध्दा सदर योजनेचा लाभ घेऊ शकतात. (अपवाद विद्यार्थी स्थानिक रहिवासी नसावा.) तसेच भारतरत्न डॉ. बाबासाहेब आंबेडकर स्वाधार योजनेकरिता संदर्भाधीन शासन निर्णयान्वये विहीत करण्यात आलेल्या अटी व शर्ती पुर्वी प्रमाणेच राहतील. याची नोंद घ्यावी, असे आवाहन समाज कल्याणचे सहाय्यक आयुक्त यांनी केले आहे.