अनुसूचित जाती उमेदवारांसाठी उद्योजकता प्रशिक्षण

 

 अनुसूचित जाती उमेदवारांसाठी उद्योजकता प्रशिक्षण

 

                       अकोला, दि. 24 : डॉ. बाबासाहेब आंबेडकर संशोधन व प्रशिक्षण संस्था (बार्टी) व महाराष्ट्र उद्योजकता विकास केंद्राद्वारे अनुसूचित जातीच्या प्रवर्गातील युवक व युवतींसाठी एक महिना कालावधीचे विनामूल्य उद्योजकता विकास प्रशिक्षण आयोजिण्यात आले आहे.

या शिबिराचा सुरूवात दि. ३० ऑक्टोबरला होऊन ते दि. २९ नोव्हेंबरला पूर्ण होईल. अनुसूचित जातीतील युवक-युवती, नवउद्योजकांना उद्योजकता विकासासंबंधी प्रशिक्षण देऊन त्यांना स्वतःचा  उद्योग व्यवसाय - स्वयंरोजगार  निर्माण  करण्यास प्रवृत्त करणे हा कार्यक्रमाचा उद्देश आहे. अनिवासी स्वरुपाच्या या प्रशिक्षण कार्यक्रमामधून सहभागी प्रशिक्षणार्थींना उद्योजकीय व्यक्तिमत्व विकास, विविध क्षेत्रातील उद्योगसंधी, उद्योगाची निवड  आदींचे प्रशिक्षण मिळेल.

त्याचप्रमाणे, उद्योग उभारणी व व्यवस्थापन ,बाजारपेठ पाहणी व व्यवस्थापन,  उद्योग व्यवसायाशी निगडीत कायदे व अंमलबजावणी कार्यपद्धती , उद्योग आधार नोंदणी , शासकीय विविध कर्ज योजना-सोयी सवलती आणि कार्यप्रणाली , सिद्धी प्रेरणा प्रशिक्षण, उत्पादनाच्या किंमती , हिशोब पध्दती , प्रकल्प अहवाल तयार करणे , उद्योजकांचे अनुभव कथन ,उद्योगांना प्रत्यक्ष भेटी , डिजिटल मार्केटिंग तसेच उद्योगाचे  वित्तीय व्यवस्थापन याविषयी तज्ज्ञांकडून मार्गदर्शन केले जाणार आहे .

                      किमान इयत्ता आठवी उत्तीर्णांना प्रवेश मिळू शकेल. वयोमर्यादा १८ ते ४५ आहे. जातीचे प्रमाणपत्र आवश्यक. आधारपत्र, पॅनकार्ड, शाळा सोडण्याचा दाखला, गुणपत्रिका, छायाचित्रे आदी कागदपत्रे घेऊन दि. २७ ऑक्टोबरला दु. २ वाजेपर्यंत महाराष्ट्र उद्योजकता विकास केंद्र द्वारा जिल्हा उद्योग केंद्र, शुक्ल सदन, दुर्गा चौक, अकोला येथे हजर राहावे. दुपारी २ वाजता मुलाखती घेऊन प्रशिक्षणार्थीची निवड करण्यात येणार आहे अधिक माहितीकरिता प्रसन्न रत्नपारखी, प्रकल्प अधिकारी, एमसीईडी व विजय बेदरकर, प्रकल्प अधिकारी, बार्टी, अकोला यांच्याशी संपर्क साधावा, असे आवाहन विभागीय अधिकारी किशोर अंभोरे  व उद्योग महाव्यवस्थापक संतोष बनसोड  यांनी एक पत्रकाद्वारे सांगितले आहे.

०००