मतमोजणीच्या पूर्वतयारीचा आढावा प्रत्येक कार्यवाही नियोजनपूर्वक पूर्ण करावी - निवडणूक निर्णय अधिकारी अजित कुंभार
मतमोजणीच्या पूर्वतयारीचा आढावा
प्रत्येक कार्यवाही नियोजनपूर्वक पूर्ण करावी
-
निवडणूक निर्णय अधिकारी अजित कुंभार
अकोला, दि. 15 : लोकसभा निवडणुकीत
06-अकोला लोकसभा मतदारसंघासाठी मतमोजणी एमआयडीसी फेज-4 परिसरातील महाराष्ट्र राज्य
वखार महामंडळ येथे दि. 4 जून रोजी सकाळी 8 वाजता सुरू होणार आहे. यासाठी नियुक्त अधिकारी
व कर्मचा-यांनी निवडणूक आयोगाच्या सूचनेप्रमाणे प्रत्येक कार्यवाही नियोजनपूर्वक व
काटेकोरपणे पार पाडावी, असे निर्देश निवडणूक निर्णय अधिकारी अजित कुंभार यांनी आज येथे
दिले.
मतमोजणीच्या अनुषंगाने नोडल अधिकारी व सहायक अधिका-यांची बैठक श्री.
कुंभार यांच्या अध्यक्षतेखाली नियोजनभवनात झाली, त्यावेळी ते बोलत होते. उपजिल्हा निवडणूक
अधिकारी महेश परंडेकर, उपजिल्हाधिकारी अनिल माचेवाड व सर्व नोडल अधिकारी, तसेच सहायक
अधिकारी उपस्थित होते.
निवडणूक निर्णय अधिकारी श्री. कुंभार म्हणाले की, संपूर्ण मतमोजणी प्रक्रियेचे
नियोजन, सनियंत्रण व अंमलबजावणी काटेकोरपणे व्हावी. निवडणूक आयोगाच्या निर्देशानुसार
प्रत्येकाने आपापली जबाबदारी समन्वयाने पार पाडावी. निवडणूक कामात कुठेही दिरंगाई होता
कामा नये. तसे कुठे आढळल्यास संबंधितांवर लोकप्रतिनिधित्व अधिनियमानुसार कारवाई करण्यात
येईल. टेबलवरील प्रत्यक्ष मतमोजणी, टपाली मतपत्रिका, व्हीव्हीपॅट स्लीप मोजणी, ईटीपीबीएस
आदी सर्व बाबींचे प्रशिक्षण संबंधितांना द्यावे. आवश्यक तो सराव करून प्रत्येक कार्यवाही
विहितपणे पार पडेल याची दक्षता घ्यावी.
मतमोजणी स्थळी त्रिस्तरीय सुरक्षा व्यवस्था
मतमोजणी केंद्र व परिसरात त्रिस्तरीय सुरक्षा व्यवस्था तैनात करण्याचे
आदेश श्री. कुंभार यांनी दिले. केंद्राच्या 100 मीटर परिसरात मोबाईल किंवा इलेक्ट्रॉनिक
वस्तू नेता येणार नाही. तपासणी काटेकोरपणे व्हावी व त्यासाठी चोख बंदोबस्त असावा, असे
आदेश श्री. कुंभार यांनी दिले. मतमोजणीसाठी नियुक्त सर्व अधिकारी व कर्मचा-यांनी सकाळी
5 वाजता मतमोजणी स्थळी उपस्थित राहणे आवश्यक आहे. ईव्हीएम मतमोजणी केंद्रात पाठवणे, फेरीनिहाय आकडेवारीची अचूक नोंद, मतमोजणी तक्त्याचे
संकलन, आवश्यक साहित्याचा पुरवठा आदी बाबी दक्षतापूर्वक पार पाडाव्यात, असे निर्देश
जिल्हाधिका-यांनी दिले.
मतमोजणी स्थळी मीडिया कम्युनिकेशन सेंटर तयार करून माध्यमांना फेरीनिहाय
माहिती व आवश्यक सुविधा उपलब्ध करून द्याव्यात. मतमोजणी केंद्रात पोलीस बंदोबस्त, मंडप व्यवस्था,
स्वच्छतागृहे, पार्किंग, आदल्या दिवशी मुक्कामी राहण्याची आवश्यकता असलेल्यांना निवासव्यवस्था
आदी बाबी सुसज्ज करण्याचेही निर्देश त्यांनी दिले.
संपूर्ण मतमोजणी प्रक्रियेचे समन्वयन, देखरेख आदी जबाबदारी अपर जिल्हाधिकारी
रामदास सिद्धभट्टी यांना देण्यात आली आहे. सहायक निवडणूक निर्णय अधिकारी संदीपकुमार अपार यांना टपाली मतपत्रिका
प्रशिक्षण, तसेच डॉ. शरद जावळे यांना प्रत्यक्ष टेबलवरील आणि व्हीव्हीपॅट स्लीप प्रशिक्षणाची
जबाबदारी देण्यात आली आहे. टपाली मतपत्रिका मोजणीसाठी अतिरिक्त सहायक निवडणूक निर्णय
अधिकारी म्हणून विजय पाटील यांना जबाबदारी देण्यात आली आहे. जिल्हा माहितीविज्ञान अधिकारी
अनिल चिंचोले व श्रीनिधी वाजपेयी यांच्याकडे ईटीपीबीएस प्रशिक्षण, रॅन्डमायझेशन आदी
जबाबदारी आहे.
०००
टिप्पण्या
टिप्पणी पोस्ट करा