स्वस्थ नारी, सशक्त परिवार अभियान स्त्रीशक्तीला आरोग्यशक्तीची साथ : ठरणार विकसित भारताचा आधार
या अभियानाचा राष्ट्रीय शुभारंभ इंदूर, मध्य प्रदेश येथे मा. पंतप्रधान श्री. नरेंद्र मोदी यांच्या शुभहस्ते होणार असून या कार्यक्रमाचे थेट प्रक्षेपण देशभरातील प्रमुख ठिकाणी करण्यात येणार आहे.
महाराष्ट्रातील राज्यस्तरीय शुभारंभ सोहळा दि. 17 सप्टेंबर 2025 मा. राज्यपाल, मा. मुख्यमंत्री, मा. उपमुख्यमंत्री, मा. आरोग्यमंत्री, मा. राज्यमंत्री आणि मान्यवरांच्या उपस्थितीत आयोजित करण्यात आला आहे.कार्यक्रमाच्या यशस्वी अंमलबजावणीसाठी सदर कार्यक्रम राज्यभर राबविण्यात येणार आहेत. जिल्ह्यातील शुभारंभ प्रसंगी पालकमंत्री ॲड. आकाश फुंडकर यांच्यासह अनेक मान्यवर उपस्थित राहतील.
कार्यक्रमासाठी उपसंचालक आरोग्य सेवा डॉ वाघचोरे डॉ बळीराम गाढवे जिल्हा आरोग्य अधिकारी अकोला व डॉ आरती कुलवाल जिल्हा शल्य चिकित्सक अकोला सुनिल लहाने आयुक्त महानगरपालिका अकोला आशिष गिरे वैद्यकीय आरोग्य अधिकारी म न पा वैद्यकीय अधिक्षक स्त्री रुग्णालय अकोला यांनी आयोजन केले आहे .याच दिवशी जिल्हा व महापालिका स्तरावर महिला व बालकांसाठी विशेष आरोग्य शिबिरे आयोजित करण्यात आली आहेत.
अभियानाची उद्दिष्ट्ये
या अभियानाचा मुख्य उद्देश देशभरातील ग्रामीण आणि शहरी भागांमध्ये महिला आणि मुलांसाठी तपासणी व विशेषज्ञ आरोग्य शिबिरे आयोजित करणे असा आहे.
या मोहिमेत आयुष्मान आरोग्य मंदिरांमध्ये दररोज (AAM-SHC) तपासणी आणि जनजागृती शिबिरे आयोजित केली जाणार आहे.
जिल्हा रुग्णालय ,जिल्हा स्त्री रुग्णालय, ग्रामीण रुग्णालये / उपजिल्हा रुग्णालये (CHCs) आणि प्राथमिक आरोग्य केंद्रे (AAM-PHC/UPHC) येथे विशेषज्ञाव्दारे तपासणी शिबिरे घेतली जाणार आहे.
खाजगी महात्मा फुले जनआरोग्य योजना संलग्नीत रुग्णालये व क्लिनिक येथे देखील विशेषज्ञ आरोग्य शिबिरे आयोजित करण्यात येणार आहेत.
या शिबिरांमध्ये विविध आरोग्य सेवा पुरवल्या जातील, ज्यात खालील गोष्टींचा समावेश आहे:
महिलांची आरोग्य तपासणी:-
उच्च रक्तदाब आणि मधुमेहाच्या निदानासाठी तपासणी करणे.
तोंडाचा कर्करोग, स्तनाचा कर्करोग आणि गर्भाशयाच्या मुखाच्या कर्करोगाच्या निदानासाठीची तपासणी करणे.
जोखीम असलेल्या महिलांसाठी क्षयरोग (Tuberculosis) तपासणी.
किशोरवयीन मुली आणि महिलांसाठी ॲनिमिया (रक्तक्षय) तपासणी आणि समुपदेशन.
आदिवासी भागातील महिलांसाठी सिकल सेल तपासणी कार्ड वाटप आणि आदिवासी भागात सिकल सेल आजाराबाबत समुपदेशन.माता आणि बाल आरोग्य सेवा
गर्भवती महिलांसाठी प्रसूतिपूर्व काळजी (ANC) तपासणी व समुपदेशन करणे.हिमोग्लोबिन तपासणी, तसेच पोषण आणि काळजी यावर समुपदेशन.बालकांचे आवश्यकतेनुसार लसीकरण केले जाईल.आयुष सेवा
या अंतर्गत आयुर्वेदिक, होमिओपॅथिक, युनानी, सिध्द व नॅचरोपॅथी इ. पर्यायी उपचार पध्दतींची सेवा गरजू रुग्णांना उपलब्ध करुन देण्यात येणार आहे. जनजागृती आणि वर्तणूक बदल संवाद,किशोरवयीन मुलींसाठी मासिक पाळीची स्वच्छता आणि पोषणाविषयी जागृती सत्रे आयोजित केली जातील.
महिला बचत गट (SHGs) आणि पंचायत प्रतिनिधींच्या माध्यमातून खाद्यतेल आणि साखरेचा वापर कमी करण्यावर समुपदेशन. पोषण समुपदेशन व निरोगी राहण्यासाठी मार्गदर्शन
1 ऑक्टोबर हा राष्ट्रीय स्वेच्छा रक्तदान दिन असून त्याअनुषंगाने राष्ट्रीय महास्वेच्छा रक्तदान या अभियानात राबविण्यात येईल. इंडियन रेड क्रॉस सोसायटी, अखिल भारतीय तेरापंथ युवक परिषद इ. संस्थांच्या साहायाने 1 लाख युनिट रक्त गोळा करण्याचे ध्येय असून, रक्तदात्यांची नोंदणी करण्याचेही प्रस्तावित आहे.
नोंदणी आणि कार्ड वाटप:
आयुष्यमान भारत डिजीटल मिशन कार्ड (ABDM), पंतप्रधान जन आरोग्य योजना (PMJAY) अंतर्गत नोंदणी व आयुष्यमान कार्ड वाटप सर्व गरजू व पात्र लाभार्थ्यांना करण्यात येईल.
क्षयरोग निर्मुलनासाठी निक्षय मित्र स्वयंसेवकांची नोंदणी.
क्षयरुग्णांना दत्तक घेऊन त्यांना पोषक आहार उपलब्ध करुन देण्यासाठी आणि क्षयरोगाविरुध्द जन आंदोलनाला पाठींबा देण्यासाठी दानशुर व्यक्ती, संस्था आणि संघटनांना निक्षय मित्र बनवून सहभागी होण्यासाठी प्रोत्साहित केले जाईल.
टिप्पण्या
टिप्पणी पोस्ट करा