महाराष्ट्र राज्य नाट्य स्पर्धेसाठी 25 सप्टेंबरपर्यंत ऑनलाईन प्रवेशिका सादर करण्याचे आवाहन हौशी मराठी, संगीत, तसेच बालनाट्य व दिव्यांग बाल नाट्य स्पर्धांचा समावेश

महाराष्ट्र राज्य नाट्य स्पर्धेसाठी 25 सप्टेंबरपर्यंत ऑनलाईन प्रवेशिका सादर करण्याचे आवाहन 

हौशी मराठी, संगीत, तसेच बालनाट्य व दिव्यांग बाल नाट्य स्पर्धांचा समावेश

अकोला, दि. २ : शासनाच्या सांस्कृतिक कार्य संचालनालयाच्या वतीने दि. 16 नोव्हेंबरपासून सुरु होणाऱ्या हौशी मराठी, हिंदी, संगीत व संस्कृत राज्य नाट्य स्पर्धांसाठी तसेच बालनाट्य स्पर्धा व दिव्यांग बालनाट्य स्पर्धांसाठी नाट्य संस्थांकडून दिनांक 25 सप्टेंबरपर्यंत ऑनलाईन प्रवेशिका मागविण्यात येत असल्याची माहिती सांस्कृतिक कार्य संचालक प्रशांत खेडेकर यांनी दिली. 

 सांस्कृतिक कार्य मंत्री ॲड. आशिष शेलार व सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनात राज्य नाट्य स्पर्धा पार पडणार आहे. 23 व्या महाराष्ट्र राज्य बालनाट्य स्पर्धेची प्राथमिक फेरी डिसेंबरपासून विविध 10 केंद्रांवर तर 65 व्या हौशी हिंदी, संगीत व संस्कृत नाट्य स्पर्धेची अंतिमफेरी प्रत्येकी एका केंद्रावर डिसेंबरपासून आयोजित करण्यात येणार आहे. नोंदणीकृत हौशी नाट्य संस्थांना तसेच गतवर्षी राज्यनाटय स्पर्धेत सहभागी झालेल्या नाट्य संस्थांना स्पर्धेसाठी विहित नमुन्यातील प्रवेशिका, नियम संचालनालयाच्या https://mahanatyaspardha.com या वेबसाईटवर ऑनलाईन उपलब्ध होतील. 

आवश्यक त्या कागदपत्रासह प्रवेशिका दि. 25 सप्टेंबरपर्यंत ऑनलाईन सादर कराव्यात. विहित मुदतीनंतर कोणत्याही परिस्थितीत प्रवेशिका स्विकारल्या जाणार नाहीत. प्रवेशिकेसोबत आवश्यक असणारी कागदपत्रे जोडलेली नसल्यास किंवा संपूर्ण तपशिल भरला नसल्यास ऑनलाईन प्रवेशिका भरता येणार नाही. स्पर्धेसाठी संस्थेची निवड झाल्यानंतर संस्थेने शासनाने निश्चित केलेल्या केंद्रावर व दिलेल्या तारखेस प्रयोग सादर केला नाही, तर त्यांची प्रवेशिकेसोबत भरलेली अनामत रक्कम शासकीय कोषागारात जमा करण्यात येईल. नाट्यस्पर्धेकरीता संस्थांना शासन नियम बंधनकारक राहतील. नियमांचे उल्लंघन केल्यास संस्थेला अपात्र ठरविण्यात येईल. राज्यातील जास्तीत जास्त नाटय संस्थांनी महाराष्ट्र राज्य नाट्य स्पर्धेत आपला सहभाग नोंदवावा असे आवाहन श्री. प्रशांत खेडेकर, संचालक, सांस्कृतिक कार्य यांनी केले आहे. ०००