व्हीबी-जीराम जीअंतर्गत आढावा रोहयोमध्ये अधिकाधिक कामांना चालना द्यावी - जिल्हाधिकारी वर्षा मीना

 

 

व्हीबी-जीराम जीअंतर्गत आढावा

रोहयोमध्ये अधिकाधिक कामांना चालना द्यावी

-        जिल्हाधिकारी वर्षा मीना

अकोला, दि. २ : जिल्ह्यातील प्रत्येक गावात व्हीबी-जीराम जी योजनेत कामांना चालना द्यावी जेणेकरून स्थानिक स्तरावर रोजगार उपलब्ध होईल, असे निर्देश जिल्हाधिकारी वर्षा मीना यांनी आज येथे दिले.

दुष्काळ परिस्थितीच्या अनुषंगाने जिल्हाधिका-यांनी रोजगार हमी योजनेतील तालुकानिहाय मजूरांची उपस्थितीचा व कामांचा आढावा बैठकीद्वारे घेतला. रोहयो उपजिल्हाधिकारी विजय पाटील, उपवनसंरक्षक सुमंत सोळंके, वनाधिकारी, कृषी अधिकारी हे सभागृहात व सर्व तहसीलदार, गटविकास अधिकारी व्हीसीद्वारे उपस्थित होते.

जिल्ह्यात आजमितीला व्हीबी-जीराम जी योजनेत २ हजार ३४२ कामे सुरू असून, ९ हजार १२५ मजूर उपस्थिती आहे. दुष्काळाच्या पार्श्वभूमीवर गावांची गरज ओळखून अधिकाधिक कामे प्रस्तावित करावी व त्यांना तत्काळ चालना द्यावी, असे निर्देश जिल्हाधिका-यांनी दिले.

शेतात किंवा मोकळ्या जागेवर उताराच्या ठिकाणी पाणी जमिनीत खोलवर मुरवण्यासाठी  जलतारा योजनेतून शोषखड्डे केले जातात. त्यानुसार प्रत्येक ग्रामपंचायतीत किमान ५० जलतारा निर्माण करण्याचे निर्देश जिल्हाधिका-यांनी दिले.

या माध्यमातून दुष्काळाच्या पार्श्वभूमीवर पशुधनासाठी गावोगाव चारा लागवडीला प्रोत्साहन द्यावे. त्याचप्रमाणे, नाला खोलीकरण, सिंचन विहीरी, वन विभागाच्या माध्यमातून गॅबियन बंधारे, घरकुल, मातोश्री पांदणरस्ते अशा कामांना चालना द्यावी. मृद व जलसंधारणाच्या कामांना प्राधान्य देऊन कामे सुरू करावी. ग्रामीण भागात जास्तीत जास्त रोजगारनिर्मितीसाठी प्रयत्न करण्याचे निर्देशही त्यांनी दिले.

०००